La gesta de alcalá (fragmento) - Poemas de ALFONSO ONCENO

Yo bien vos provaré
sus fechos e la su vida.

De Alcalá fablaré,
en commo fue conquerida,
e si asanchar quisieren,
yo gelo sabré contar;
aquellos que lo sopieren
sienpre abrán de fablar.

Por dar honra a los cristianos,
este rey de grand bondat
ayuntó los castellanos
en Cordova, la çibdat.

Entró luego en su carrera,
el noble rey fizo entrada,
fizo tenblar la frontera
e el reyno de Granada.

Illora luego corrió,
Montefrío, otro tal,
sobre Alcalá se bolvió
este buen rey natural.

Vió Alcalá de Bençayde,
e miróla commo cuerdo,
Enbió por el alcayde,
don Abrahám, el guerdo.

De la villa se salió
este alcayde pagano,
con el noble rey se vió,
e fuele besar la mano.

Dixo: "Omillone, señor,
don Alfonso de Castiella,
commo aquel rey mejor,
que nunca sobió en siella,
rey muy bien aventurado,
qual otro non fue nasçido".

El rey fabló mesurado:
"Bien seades bos benido.
Por bos enbié, alcayde,
para saber una cosa,
beo Alcalá de Vençayde,
villa fuerte e muy fermosa;
bien se que non han paganos
tan buena billa sin falla,
non ha moros nin cristianos
que le puedan dar batalla...